Póstdreifing að lágmarki einu sinni í viku
„Frumvarpið um opnun póstmarkaða kveður á um að eftir sem áður ber hinu opinbera skylda til þess að tryggja aðgengi notenda að lágmarks-póstþjónustu, þ.e. alþjónustu. Í frumvarpinu eru ákvæði sem tryggja, að geti markaðsaðilar ekki veitt alþjónustu á markaðsforsendum sé hægt að grípa inn í með því að bjóða út þjónustuna eða útnefna alþjónustuveitanda ef ekki er talið hagkvæmt og skilvirkt að bjóða þjónustuna út.“
Þetta kemur fram í svari innanríkisráðuneytisins við fyrirspurn Morgunblaðsins til innanríkisráðherra, um það hvort ráðherra óttist ekki að með afnámi einkaréttar muni póstþjónusta á landsbyggðinni versna enn meir.
Í svarinu er vakin athygli á því, að nú þegar hafi verið dregið úr þjónustu á höfuðborgarsvæðinu með því að B-póstur sé borinn út að jafnaði annan hvern dag, það sé um 70% af heildarpóstmagni þess sem borið sé út á landinu.
Þetta kemur fram í Morgunblaðinu í dag. Þar segir einnig m.a.:
Um það hvort ríkinu beri ekki skylda til að tryggja öllum landsmönnum sambærilega póstþjónustu, óháð búsetu, segir ráðuneytið í svarinu að allir landsmenn eigi rétt á alþjónustu og skuli þjónustan að jafnaði boðin alla virka daga. Alþjónustuskyldan sé þó ekki fortakslaus og mögulegt að heimila frávik frá henni.
„Heimilt er að fækka dreifingardögum að teknu tilliti til eftirspurnar eftir þjónustu vegna umtalsverðs kostnaðar eða þegar kringumstæður eða landfræðilegar aðstæður hindra útburð alla virka daga. Dreifing alþjónustuveitanda skal þó að lágmarki vera einu sinni í viku, að því gefnu að hún sé yfir höfuð framkvæmanleg,“ segir m.a. í svarinu.
Samkvæmt boðuðu frumvarpi innanríkisráðherra er gerð sú krafa að að minnsta kosti 85% bréfa í A-pósti séu borin út daginn eftir.
Undanþága frá lögum veitt í reglugerð
Póstdreifingardögum fækkað um helming, Guðbirni pósti sagt upp