Mynd: Skessuhorn.

„Hingað hafa borist erindi frá sveitarstjórnum sem lýsa óánægju með þessa breytingu. Við að sjálfsögðu hlustum á þau sjónarmið, en ákvörðun okkar stendur,“ segir Brynjar Smári Rúnarsson, forstöðumaður hjá Póstinum. Um er að ræða þá ákvörðun Íslandspósts að fækka dreifingardögum á pósti í dreifbýli samkvæmt leyfi frá Póst- og fjarskiptastofnun. Frá næstu mánaðamótum verður póstinum dreift þrjá daga í viku aðra vikuna og tvo daga í hinni.

Þetta kemur fram í frétt Sigurðar Boga Sævarssonar blaðamanns í Morgunblaðinu í dag.

„Samkvæmt skilgreiningu er þetta lágmarksþjónusta en Pósturinn mun áfram leitast við að veita sem besta þjónustu í samræmi við óskir hvers viðskiptavinar,“ segir Brynjar. „Þó verður að segjast að kostnaður við póstdreifingu úti í sveitunum er mjög hár og meðgjöfin er mikil. Það er á engan hátt hlutverk Íslandspósts að niðurgreiða þessa þjónustu og við höfum því í raun enga aðra kosti í stöðunni.“

Brynjar bætir við að halda verði því til haga að áfram verði haldið uppi daglegum póstflutningum um allt land, það er á pósthús og aðra afgreiðslustaði. Þangað geti dreifbýlisfólk nálgast sendingar ef mikið liggur við, ella beðið til næsta dags eða pantað heimsendingu strax gegn aukagjaldi.

Stólað á póstinn

Fækkun póstdaga í sveitinni kemur illa við íbúa þar og „er algjörlega ólíðandi,“ eins og segir bókun sem sveitarstjórn Flóahrepps gerði á dögunum. Þá hafi póstkassar nýlega verið færðir út að þjóðvegi í stað þess að vera heima við bæi. „Það væri strax til bóta ef pósti væri dreift þrjá daga í hverri viku, en ekki tvo daga í annarri vikunni,“ segir Árni Eiríksson, oddviti Flóahrepps, í samtali við Morgunblaðið.

Póstmál komu einnig til umræðu á aðalfundi Búnaðar- og framfarafélags Landmannahrepps í Rangárþingi ytra nýlega. Þar segir að fólk í sveitum stóli á póstinn, til dæmis að reikningar berist í tæka tíð, sé fólk ekki með heimabanka. „Netsamband er víða hvergi nærri í neinu lagi og enginn vilji hjá símafyrirtækjum að þjónusta landsbyggðina eins og vert sé,“ segir Sigurbjörg Elimarsdóttir á Galtalæk á Landi.

Skerðingin á póstþjónustunni frestast um mánuð

Reykhólahreppur: Ráðherra ritað bréf vegna skerðingar á póstþjónustu