Ráðherra boðar markaðssókn í ferðaþjónustu
Össur Skarphéðinsson iðnaðar- og ferðamálaráðherra boðaði mikla markaðssókn ferðaþjónustunnar á Ferðamálaþingi í dag. Hann sagði nauðsynlegt að byggja upp ferðamannastaðina í landinu og leggur til, að til þess verði settur fastur tekjustofn á fjárlögum. Ráðherrann greindi frá því að ríkisstjórnin hefði aukið framlög til markaðssetningar ferðaþjónustunnar erlendis. Hann lagði áherslu á að það væri fjárfesting, ekki kostnaður. Sömuleiðis væri brýn þörf á að auka fjárfestingu innanlands.
Össur segir að setja verði fastan tekjustofn í ferðaþjónustuna á fjárlögum. Hann ætli sér að leggja fram frumvarp þess efnis núna í vetur. Til greina komi að setja sérstakt brottfarargjald á alla farþega sem fari frá landinu eða leggja 0,05% veltuskatt á fyrirtæki. Sú prósenta væri ekki mikil þegar litið sé til þess að ríkisstjórnin sé nýbúin að fella niður 3% af tekjuskatti fyrirtækja. Þetta myndi búa til 400-500 milljónir á ári til að byggja upp ferðamannasvæðin og auglýsa landið erlendis.