Eins og hér var greint frá verða hátíðahöld á Dynjandisheiði í kvöld, fimmtudag. Tilefni þeirra er  að í haust eru 50 ár liðin síðan vegur var lagður um Dynjandisheiði og akvegasamband komst á milli byggðarlaga á Vestfjörðum og milli Reykjavíkur og Ísafjarðar. Fagnaðurinn hefst kl. 19 og gert er ráð fyrir að honum ljúki ekki seinna en um kl. 21. Allir eru velkomnir og verður gestum boðið upp á kjötsúpu auk þess sem drykkir verða til reiðu, bæði kaffi og gos. Til sýnis verður jarðýta sem var notuð við vegagerðina fyrir 50 árum. Hún hefur verið gerð upp og er vel gangfær. Dagskráin á heiðinni verður í stórum dráttum á þessa leið:

 

Ávörp flytja:

- Ásvaldur Guðmundsson ýtustjóri, sem vann við vegagerðina.

- Gísli Eiríksson hjá Vegagerðinni, sem lýsir möguleikum til úrbóta svo að komið verði á heilsárs vegasamgöngum milli byggðarlaga á Vestfjörðum.

- Sólrún Ólafsdóttir á Patreksfirði fyrir hönd íbúa.

- Kristján L. Möller samgönguráðherra.

 

Tónlist og ljóð:

- Karlakór syngur.

- Elfar Logi Hannesson leikari flytur ljóð sem Guðmundur Ingi Kristjánsson á Kirkjubóli í Önundarfirði orti í tilefni af vegagerðinni fyrir 50 árum.

- Halldór Smárason og Halldór Sveinsson frá Ísafirði leika á hljóðfæri og Rannveig Björg Þórarinsdóttir óperusöngkona syngur. Rannveig er að ljúka framhaldsnámi í Vínarborg og er ættuð frá Patreksfirði.

 

- Afhjúpuð verður áskorun til stjórnvalda.

 

- Að lokinni hátíðardagskrá leikur hljómsveitin Yxna frá Ísafirði.

 

Talsmenn hópsins sem veita frekari upplýsingar um málið eru:

- Sigmundur Þórðarson, Þingeyri, vasasími 863 4235.

- Magnús Ólafs Hansson, Patreksfirði, vasasími 868 1934.