Truflanir voru á Króksfjarðarneslínu í veðurhamnum í gærkvöldi og reyndist línan slitin á fimm stöðum í Gilsfirði. Þar er rafmagnslaust á tveim bæjum en viðgerð stendur yfir, að því er fram kemur á vef Orkubús Vestfjarða. Rafmagn fór af norðanverðum Vestfjörðum í gærkvöldi þegar Mjólkárlína Landsnets sló út um klukkan hálftíu. Rafmagnslaust varð í nokkrar mínútur vegna þessa í Önundarfirði, Súgandafirði, á Ísafirði, í Bolungarvík og Álftafirði.

Einnig hafa verið rafmagnstruflanir á Ströndum. Miklar truflanir byrjuðu á Drangsneslínu um kl. átta í gærkvöldi. Ísing var og mikil hreyfing á línunni. Árneshreppur var án rafmagns um klukkustund og varaafl keyrt á Drangsnesi um tíma. Einnig voru truflanir á Þorpalínu í Steingrímsfirði sem sló út um klukkan hálfellefu. Truflanir urðu í Ísafjarðardjúpi og er keyrt varaafl á hluta Djúpsins frá Reykjanesi.

 

Orkubú Vestfjarða