Atvinnuþróunarfélag Vestfjarða vinnur nú ásamt Nýsköpunarmiðstöð Íslands, Orkubúi Vestfjarða og Bjarna M. Jónssyni að stofnun Vesturorku, félags sem tengist möguleikum á nýtingu sjávarfalla á Vestfjörðum. Tilgangur félagsins verður m.a. smíði og rekstur raforkuvera sem nota endurnýjanlega orkugjafa. Eins og fram hefur komið hefur að undanförnu verið unnið að því að kanna möguleika á Vestfjörðum á því að virkja sjávarföll. Athugunin er liður í meistaraverkefni Bjarna M. Jónssonar í Haf- og strandsvæðastjórnun við Háskólasetur Vestfjarða. „Þetta er mjög spennandi verkefni og við erum að vinna að því núna að koma félaginu á legg“, segir Þorgeir Pálsson, framkvæmdastjóri Atvest.

 

Á myndinni er sýnd þverun og brú í mynni Þorskafjarðar ásamt virkjun. Í brúnni eru hverflar sem framleiða rafmagn á útfalli. Rafleiðslur í formi jarðstrengja liggja með veginum. Myndin er byggð á gervitunglamynd frá Google.

 

Sjá einnig:

180 megavatta hámarksafl frá Þorskafjarðarvirkjun