Niðurskurður af hálfu ríkisins kemur mjög illa við rekstur Dvalar- og hjúkrunarheimilisins Barmahlíðar á Reykhólum. Hann svarar til 14,4 milljóna króna framlags frá ríkinu á ári eða um 15% af framlagi til heimilisins. Í bókun hreppsnefndar Reykhólahrepps í gær segir, að þar með sé rekstrargrundvöllur Barmahlíðar brostinn. Hjúkrunarforstjóra Barmahlíðar barst um miðjan síðasta mánuð tölvupóstur frá ráðuneyti um niðurskurðinn. Hjúkrunarforstjóri kom erindi þessu áfram til hreppsnefndar, enda er henni málið skylt, að ekki sé meira sagt.

 

Vegna þessa máls kom hreppsnefnd þá saman á skyndifund ásamt hjúkrunarforstjóra Barmahlíðar og sendi frá sér mótmæli við niðurskurðinum til fjármálaráðuneytis og velferðarráðuneytis með afriti til allra þingmanna í kjördæminu. Jafnframt var óskað eftir fundi með ráðherra velferðarmála vegna málsins.

 

Fjórir þingmenn hafa sýnt málefninu stuðning með komu sinni til Reykhóla og átt fundi með sveitarstjóra, hreppsnefnd og hjúkrunarforstjóra. Þessir þingmenn eru Ásbjörn Óttarsson, Ásmundur Einar Daðason, Einar Kristinn Guðfinnsson og Guðmundur Steingrímsson. Fleiri þingmenn hafa komið á framfæri áhuga sínum á málinu.

 

Framkvæmdastjóri Þörungaverksmiðjunnar á Reykhólum, Atli Georg Árnason, hefur einnig látið málið til sín taka. Hann segir málefnið verksmiðjunni og samfélaginu á svæðinu í heild sinni mjög mikilvægt og áhrifa niðurskurðarins myndi gæta víða.