Frá Reykhóladeginum 2008.

Fimmtán manns komu á fund sem Harpa Eiríksdóttir ferðamálafulltrúi Reykhólahrepps efndi til varðandi Reykhóladagana 2011, en þeir verða haldnir 4.-7. ágúst (fimmtudag til sunnudags). Þar var rætt hvað fólk legði til að hafa á dagskránni og hvernig ætti yfirleitt að standa að þessari byggðarhátíð. Meðal annars var samþykkt á fundinum að hafa aldurstakmarkið 10 ára og eldri á spurningakeppninni árlegu og 16 ára og eldri á matnum og balli á laugardagskvöldinu. Ein af nýjungunum á Reykhóladögum verður kassabílakeppni. Krakkar eru hvattir til að afla sér verkfæra og ýmislegs annars sem til þarf og hanna og smíða flotta kassabíla og taka þátt í aksturskeppni. Þarna verður líka frumlegasti kassabíllinn valinn og verðlaun veitt.

Í atburðadagatalinu hér efst til hægri er hægt að sjá fyrstu drög að dagskrá Reykhóladaganna í ár (4.-7. ágúst).

Listafólk sveitarinnar sem vill sýna verk sín er beðið að hafa samband við Hörpu í síma 894 1011 eða á netfangið info@reykholar.is sem fyrst til að hægt sé að finna hentugt húsnæði.

Spurningakeppnin verður sem áður á föstudeginum. Lið eru beðin um að skrá sig á netfangið info@reykholar.is.

Auk kassabílarallsins verður annar nýr dagskrárliður fyrir börnin en það er söngkeppni á föstudeginum. Krakkar eru hvattir til að skrá sig hjá Hörpu í síma 894 1011 eða á netfangið info@reykholar.is.

Enn vantar vaska sjálfboðaliða í nokkur verkefni á Reykhóladögunum. Fólk sem vill veita liðsinni sitt er endilega beðið að hafa samband við Hörpu sem fyrst.