Búið er að slá því föstu að Reykhóladagarnir 2011 verða 4.-7. ágúst og standa því frá fimmtudegi og fram á sunnudag, að sögn Hörpu Eiríksdóttur, ferðamálafulltrúa Reykhólahrepps. Þegar er búið að bóka Halla og Þórunni á Ísafirði til að spila og syngja á ballinu. Þau hafa m.a. annast tónlistina á Ögurballinu fræga í Ísafjarðardjúpi undanfarin ár, auk þess að spila á óteljandi dansleikjum á Ísafirði og víðar á liðnum árum. Einnig hefur Harpa fengið Örn Árnason leikara til að annast veislustjórn líkt og hann gerði á Reykhólum árið 2008 þegar hann sló rækilega í gegn.

 

Undanfarin ár frá því að héraðshátíð Reykhólahrepps var komið á laggirnar hefur hún verið síðustu helgina í ágúst. Fyrstu árin var talað um Reykhóladaginn, enda var hátíðin þá aðeins einn dag, en á síðasta ári stóðu Reykhóladagarnir frá föstudegi og fram á sunnudag.

 

Verið er að skoða samvinnu við Ólafsdalshátíðina, sem verður sunnudaginn 7. ágúst. Þar kemur fram meðal annars Leikhópurinn Lotta. Ólafsdalshátíðin var haldin í fyrsta sinn sumarið 2008 (myndasyrpa).

 

Fyrir liggur að Gauti Eiríksson kennari frá Stað á Reykjanesi sér um spurningakeppni á föstudagskvöldinu. Hann er þrautreyndur í þeim efnum, bæði syðra og á fyrri hátíðum á Reykhólum.

 

Laugardagurinn 6. ágúst er messudagur í Flatey á Breiðafirði. Harpa er í viðræðum við sóknarnefndina þar um að hafa messuna um morguninn. Jafnframt er hún að skoða möguleikana á ferðum út í Flatey til að sem flestir geti brugðið sér þangað og verið við messuna og notið þess einnig á annan hátt að skjótast út á Breiðafjörðinn og koma í höfuðstað hans.

 

Sjá einnig:

22.02.2011  Harpa frá Stað ráðin í nýja stöðu ferðamálafulltrúa