Í fyrra var tekinn upp sá háttur, að dregið er úr hópi fámennra sveitarfélaga til að taka þátt í spurningakeppninni Útsvari, sem verður í Sjónvarpinu núna í vetur níunda árið í röð. Úr hópi fámennustu sveitarfélaganna hefur Reykhólahreppur verið dreginn út til þátttöku að þessu sinni. Sveitarfélögin sem keppa í vetur í Útsvari eru 24 eins og verið hefur síðustu ár. Þau átta lið sem komust í fjórðungsúrslit síðast eru sjálfkrafa með þennan veturinn en hin sextán eru dregin út eftir stærð sveitarfélaga.

Ef forsvarsmenn Reykhólahrepps vilja taka þátt í keppninni þarf að staðfesta það sem allra fyrst, helst í þessari viku. Keppnin hefst föstudaginn 11. september.

Fólk sem vill gefa kost á sér til keppni í Útsvari fyrir hönd Reykhólahrepps, eða koma á framfæri tillögum um keppendur fyrir hönd hreppsins, er beðið að gera það allra næstu daga. Síminn á skrifstofu Reykhólahrepps er 430 3200 og netfangið hjá sveitarstjóra er sveitarstjori@reykholar.is.