Reykhólamaður sigraði á Strandamannamóti
Guðjón D. Gunnarsson (Dalli) á Reykhólum og Björn Pálsson í Þorpum við Steingrímsfjörð sigruðu á árlegu héraðsmóti Strandamanna í brids, sem haldið var í félagsheimilinu í Árnesi í Trékyllisvík í vikunni. Spilaður var tvímenningur og tóku tuttugu manns eða tíu pör þátt í mótinu. Tveir Reykhólamenn gerðu ferð sína til keppni, þeir Dalli og Eyvindur Magnússon, sem hafa farið ófáar ferðirnar á Strandir til að spila. „Við Eyvi erum nú eiginlega Strandamenn,“ segir Dalli.
Dalli og Björn hafa lengi verið makkerar í bridsinu. Í öðru sæti urðu Ingimundur Pálsson og Már Ólafsson og í þriðja sæti Vignir Pálsson og Guðbrandur Björnsson. Þess má geta að þeir Björn, Ingimundur og Vignir eru bræður.
Þórarinn Ólafsson í Stekkjarlundi í Reykhólasveit slóst í förina með Dalla og Eyva. Hann fór þó ekki til að spila heldur notaði hann tímann til myndatöku í Trékyllisvík og tók jafnframt myndirnar af bridsmönnum sem hér fylgja.