Þang- og þaraflutningaskipið Karlsey við bryggju í Karlsey.

Nóg er um þangið og þarann á breiðfirskum hleinum.

« 1 af 2 »

Þaraböð eru lítið þekkt hérlendis þótt þau séu í boði víða annars staðar í heiminum. Nú styttist hins vegar í að fólk geti skellt sér í þarabað hér á landi. Hugmyndina hafa þær Sólrún Sverrisdóttir og Svanhildur Sigurðardóttir á Reykhólum þróað, en nóg er af þaranum þar í kring. Þær fóru að gera tilraunir á eigin skinni, í bókstaflegri merkingu, með því að setja þaramjöl frá Þörungaverksmiðjunni í hitaveituvatn í heitum potti. Útkoman var, eins og Sólrún orðar það, algjör sæla.

Sólrún segir að þarinn og þaramjölið virki vel á húðsjúkdóma en í því er mikið af vítamínum og steinefnum sem húðin á gott með að taka upp. Þær stöllur stefna að því að opna baðhús á Reykhólum sem fyrst, þar sem boðið verður upp á þaraböð og einnig sjóböð og leirböð. Frá þessu var greint á ruv.is.

Á mynd nr. 1 má sjá netpoka með þangi eða þara um borð í Karlsey, flutningabát Þörungaverksmiðjunnar, við bryggjuna í Karlsey, skammt frá verksmiðjunni. Í baksýn sér til þorpsins á Reykhólum. Mynd nr. 2 er tekin á sama stað með nokkrum aðdrætti (smellið á myndirnar til að stækka þær).