Sveitarstjórnarmenn á Vestfjörðum krefjast þess að ríkið fari í langtíma fjárhagsáætlunargerð sem komi til móts við fjárhagsáætlanir sveitarfélaga. Þetta kom fram á árlegum fundi sveitarstjórnarmanna með þingmönnum kjördæmisins sem haldinn var á Patreksfirði í fyrradag. Þar var fjallað sérstaklega um fjármál sveitarfélaga og mótmæltu sveitarstjórnarmenn niðurskurði á framlögum Jöfnunarsjóðs sveitarfélaga. Að fundi loknum héldu sveitarstjórnarmenn og þingmenn opinn íbúafund um atvinnumál á suðursvæði Vestfjarða, sem um 500 manns sóttu.