Rjúpur / Wikipedia.

Jörðin Klettur í Geiradal bætist á listann yfir jarðir í Reykhólahreppi þar sem skotveiði er bönnuð. „Öll hlið að bænum eru vel merkt að óheimil sé öll skotveiði á jörðinni en aldrei er góð vísa of oft kveðin,“ segir Hreggviður Þorsteinsson, sem er í forsvari fyrir Klett.

Fleiri en skotveiðimenn stunda þó rjúpnaveiði hérlendis.

„Það hefur verið hópur af rjúpum heima á hlaði hjá okkur til margra ára, nema hvað svo brá við að þessu sinni að rjúpa á hreiðri með 12 eggjum hvarf og engar rjúpur sáust heima við hús í ár,“ segir Hreggviður. „Náttúrufræðistofnun heldur helst að rjúpan hafi lent í kjaftinum á einhverju villidýri. Gæti jafnvel hafa verið villiköttur en þá höfum við orðið vör við öðru hverju“, segir hann.

Listi yfir jarðir í Reykhólahreppi sprettur upp þegar smellt er á borða með auglýsingum um veiðibann sem birtast á víxl við aðra hér fyrir ofan og neðan efstu frétt. „Af tæknilegum ástæðum“ verður ekki hægt að bæta Kletti í Geiradal á þann lista fyrr en eftir helgi.