Rúllupylsukeppnin: „Verður nú vart aftur snúið“
Eins og hér var greint frá var nýjung á ferðinni á síðari laugardegi jólamarkaðarins í Króksfjarðarnesi í gær: Rúllupylsukeppni. Að sögn Höllu Steinólfsdóttur í Ytri-Fagradal bárust rúllupylsur í keppnina úr ýmsum áttum - að sjálfsögðu úr Reykhólahreppi og Dölum og norðan af Ströndum, og allt sunnan af Suðurnesjum. Dómurum var vandi á bragðlaukum en niðurstaðan varð þessi:
Hafdís Sturlaugsdóttir og Matthías Lýðsson í Húsavík á Ströndum hlutu fyrsta sætið fyrir léttreykta rúllupylsu. Þau fengu líka önnur verðlaun fyrir ávaxtafyllta rúllupylsu. Sérstaka viðurkenningu fékk rúllupylsa frá Sverri Kristjánssyni og Heiðrúnu Sigurðardóttur í Reykjanesbæ.
Rúllupylsudómarar voru Dominique Plédel Jónsson, formaður Slow Food á Íslandi, og Ómar B. Hauksson, kjötiðnaðarmeistari í Borgarnesi. Á sumum myndanna sem hér fylgja má sjá þau að störfum.
Gestir á jólamarkaðinum fengu auðvitað að smakka á rúllupylsunum líka.
Fram kemur á vef Dalabyggðar, að hugmyndin að keppninni hafi kviknað á Salone del Gusto í Torino á Ítalíu. Þar voru á ferð Þorgrímur og Helga á Erpsstöðum í Dölum ásamt Höllu í Ytri-Fagradal að selja heimaframleiðslu sína á Slow-Food-matarhátíðinni þar. Í anda Slow Food ákváðu þau síðan að efna til samkeppni í rúllupylsugerð til að vekja athygli á gömlum og góðum íslenskum matarhefðum.
„Flestum kom fjölbreytt úrvinnsla virkilega á óvart og verður nú vart aftur snúið að halda keppnina aftur að ári,“ segir á vef Dalabyggðar.
Myndirnar sem hér fylgja frá markaðinum og rúllupylsukeppninni í gær tóku Valdís Einarsdóttir á Lambeyrum og Sveinn Ragnarsson á Svarfhóli.