Bjartmarssteinn er fyrir miðri mynd. Ljósm. © Ágúst G. Atlason.

Borgarland milli Króksfjarðar og Berufjarðar, Bjartmarssteinn fremst. Ljósm. © Árni Geirsson.

« 1 af 2 »

Inga Rós Georgsdóttir, BA-nemi í þjóðfræði við Háskóla Íslands, leitar eftir sögum og sögnum sem tengjast Bjartmarssteini í Reykhólasveit (hann hefur líka verið nefndur Pjattarsteinn og Bjartmannssteinn og kannski eru enn fleiri útgáfur af þessu örnefni). Núna liggur fyrir Ingu Rós að gera útvarpsþátt um eitthvert viðfangsefni í þjóðfræði og hana langar að gera þátt um Bjartmarsstein og huldufólkið þar.

Þess vegna óskar hún eftir því að komast í samband við fólk sem getur frætt hana um þjóðtrú og sagnir varðandi þessa merkilegu náttúrusmíð. Jafnframt væri vel þegið ef henni væri bent á fólk sem gæti liðsinnt henni í þessu efni en les kannski vefi ekki mikið.

Sagnir herma að Bjartmarssteinn sé kaupstaður huldufólks við innanverðan Breiðafjörð. Hann er gígtappi af sömu gerð og Vaðalfjöll. Á báðum stöðum hefur móbergið veðrast utan af harðara bergi sem storknað hefur þar sem forðum kom upp hraun.

Inga Rós slær ekki hendinni á móti öðrum fróðleik og sögnum úr Reykhólasveit. Þar nefnir hún t.d. sögur af Rauðsokku eða Elínu sem varð úti á Barmahlíð.

Þess má geta, að Inga Rós á ættir að rekja að Hyrningsstöðum í Reykhólasveit, þannig að málin eru henni nokkuð skyld. Frá Hyrningsstöðum blasir Borgarlandið við handan Berufjarðar og fremst á nesinu milli Berufjarðar og Króksfjarðar er Bjartmarssteinn.

Endilega hafið samband við Ingu Rós í netpósti - alveg sama hversu lítið þið haldið ykkur vita!