„Kassinn er tómur og það er boðaður niðurskurður í vetrarþjónustu um tíu til tuttugu prósent", segir Ingvi Árnason, deildarstjóri viðhalds og þjónustu á Norðvestursvæði hjá Vegagerðinni. Ingvi segir útfærslu samdráttarins algjörlega eftir en verið sé að vinna í henni í höfuðstöðvum Vegagerðarinnar þessa dagana. Hins vegar segi það sig sjálft að þetta þýði í reynd tuttugu til þrjátíu prósenta samdrátt í þjónustu almennt, þótt augljóslega sé ekki hægt að skera jafnmikið niður alls staðar. Það sé þó ljóst að minna fjármagn sé til snjómoksturs á þessum vetri en áður, sem gæti komið illa við Vestfirðinga.

 

Aðspurður segir Ingvi að áhersla verði lögð á að viðhalda góðri upplýsingaþjónustu, enda verði það enn mikilvægara en áður að fólk hafi aðgang að upplýsingum um færð á vegum þegar ekki verði unnt að sinna snjómokstri eins ötullega. „Það eru allir mjög meðvitaðir um það sem eru að vinna í þessu að það verður að kynna mjög rækilega hvað verður gert", segir Ingvi. Þetta kemur fram á bb.is.