Þegar Gunnar Dalkvist Guðjónsson frá Mýrartungu í Reykhólasveit, bóndi í Bæ í Trékyllisvík, kom í fjárhúsin í morgun til gjafa var ein ærin borin. Ærin sem er fimm vetra og heitir Vanda var borin stóru hvítu hrútlambi. Hún virðist hafa komist í hrút rétt áður en þeir voru teknir inn í haust. Ekki er annað vitað en þetta sé fyrsta lambið sem fæðst hefur í Árneshreppi áður en hefðbundinn sauðburður hefst í maí.

 

Frá þessu er greint á fréttavefnum litlihjalli.is sem Jón G. Guðjónsson í Litlu-Ávík í Árneshreppi heldur úti og þar eru fleiri myndir.

 

Á myndinni sem hér fylgir eru ærin Vanda og Pálína Hjaltadóttir í Bæ með dótturina Magneu Fönn Gunnarsdóttur en Aníta Mjöll skoðar lambið.