Segir heimamenn þekkja betur til en Ögmundur
„Ég tel að viðtökur heimamanna við tillögum Ögmundar geri það að verkum, að þær séu núna gersamlega slegnar út af borðinu. Það er einfaldlega þannig, að heimamenn munu ekki una því að þeirri niðurstöðu verði troðið ofan í kok manna að fara með þennan veg um hálsana. Það mál var í sjálfu sér löngu fullreynt og það vissum við sem vorum að fylgjast með og taka þátt í þessum málum“, segir Einar K. Guðfinnsson, þingmaður NV-kjördæmis. Hann segir að margoft sé búið að reyna að sannfæra fólk um að það sé í lagi að fara með veginn um Hjallaháls og Ódrjúgsháls.
„Við heimamenn vitum hins vegar betur og það kom rækilega fram á þessum fundum sem Ögmundur átti með heimamönnum. Ég vil þakka honum fyrir það að mæta til fundanna, en núna er það augljóst að málið er komið aftur á þann reit sem það var áður en samráðsferlið hófst,“ segir Einar. Hann segir að nú hljóti ráðamenn að skilja að ekki þýði að tefla fram hálsaleiðinni sem lausn á samgönguvanda Vestur- og Austur-Barðastrandarsýslu. Hún komi ekki til greina.
„Næsta skref að mínu mati hlýtur að vera það að láta skoða aðra kosti vegagerðar á láglendi á þessu svæði. Best væri að halda sig við B-leiðina um Teigsskóg en ef ráðherra treystir sér ekki að fara gegn óbilgjörnum kröfum einstakra aðila og fara þá leið, þá verður hann að skoða aðra kosti og gera það strax.“ Meðal annars vill Einar skoða betur A-leiðina, sem margir í Reykhólasveit hafi gert kröfu til, eða aðra þverun Þorskafjarðar.
„Ef Ögmundur fer með tillögu sína fyrir Alþingi, þá trúi ég ekki öðru en að hún verði einfaldlega felld. Ég trúi því ekki að þingmenn Norðvesturkjördæmis ætli sér að fara þvert á vilja íbúanna og samþykkja einhverja leið, þvert á vilja þeirra sem þarna búa og best þekkja til“, segir Einar Kristinn.
- Byggt á samtali við Einar K. Guðfinnsson á fréttavefnum bb.is á Ísafirði í dag.
Meðfylgjandi mynd sem fengin er á vefnum vegur.is (um samgöngumál á Vestfjörðum) tók Jónas Guðmundsson sýslumaður í Bolungarvík. Þar sér yfir Hjallaháls milli Þorskafjarðar vinstra megin á myndinni og Djúpafjarðar hægra megin. Lengra til hægri er Gufufjörður. Yst er mynni Þorskafjarðar með Reykjanes til vinstri og Skálanes til hægri.
20.09.2011 Fundurinn í Bjarkalundi: Ráðherra lokar ekki á neitt