Leyfileg efri mörk útsvarsprósentu hafa nú verið hækkuð. Flest sveitarfélög landsins nýta sér það og veitir ekki af. Einn reyndasti endurskoðandi landsins, Sveinn Jónsson, hvetur til þess í grein í Fréttablaðinu í dag, að lögum um skattlagningu einkahlutafélaga verði breytt, því að núverandi fyrirkomulag gagnist fyrst og fremst hátekjufólki og stuðli að misrétti í þjóðfélaginu. Afleiðing núgildandi laga um skattgreiðslur hlutafélaga og einkahlutafélaga sé sú, að sveitarfélög fái minni skatttekjur en ella væri. Nú sé verið að hækka útsvarsprósentuna og þannig sé hinn almenni launþegi að taka á sig verulegan hluta af eftirgjöfinni til sérréttindahópsins.

Sveinn segist alla tíð hafa haft miklar efasemdir um skattalagabreytingar sem afgreiddar hafi verið í skyndi árið 2001, en þá var tekjuskattur á hlutafélög og einkahlutafélög lækkaður úr 30% í 18%. Hann hefur síðan verið lækkaður í 15%. Sveinn segir að lagabreytingin hafi verið gerð undir formerkjum skattasamkeppni milli landa, en jafnræðissjónarmiðum vikið til hliðar. Auðvelda hafi átt útrás íslenskra fyrirtækja og létta innlendum fyrirtækjum samkeppni við erlend fyrirtæki. Með skattalækkuninni hafi skattar á eigendur fyrirtækjanna verið lækkaðir verulega. Sveinn segir furðulegt að lækkunin hafi ekki verið takmörkuð við þau fyrirtæki sem væru í alþjóðlegri samkeppni heldur látin ná til allra fyrirtækja í landinu. Það hafi verið gert án sérstaks rökstuðnings. Sveinn segist vera þeirrar skoðunar að sterk sérhagsmunaöfl hafi ráðið mestu um búning skattalækkunarinnar.

Sveinn rifjar upp að í kjölfar laganna hafi einkahlutafélögum fjölgað um þúsundir, enda gefi lögin tekjuháum einstaklingum í rekstri tækifæri til að lækka skatta sína um hundruð þúsunda á ári hverju. Lagaákvæði um svokölluð „reiknuð laun" komi ekki í veg fyrir þetta. Afleiðing laganna sé að sveitarfélög fái minni skatttekjur en ella. Sveinn segir að samkvæmt tölum frá árinu 2005 hafi rúmlega 1700 einkahlutafélög greitt meira en 100% arð af hlutafé og arðshlutfallið hjá þessum félögum hafi að meðaltali verið 650%. Þetta sé afar skýr vísbending um hve langt sé gengið í því að greiða eigendum einkahlutafélaga ótrúlega háan arð af hlutafé í staðinn fyrir laun.

Sveinn segir óeðlilegt að lög séu þannig úr garði gerð að stór hópur einstaklinga í sjálfstæðum rekstri geti tekið fjármagn út úr rekstrinum til eyðslu og annarra persónulegra nota og greitt í því sambandi mun lægri skatta en almennir launþegar. Hann segist ekki fá séð hvernig náðst getur samstaða og samhugur með þjóðinni í núverandi erfiðleikum ef ekki verði tekið á þessu misrétti í skattamálum.