Mynd: Wikipedia.

Hin árlega Selaveisla Samtaka selabænda verður haldin annað kvöld, laugardag, í Haukahúsinu í Hafnarfirði. Þar verður á boðstólum úrval af íslenskri villibráð og ekta sveitaballastemning. Skemmtidagskrá er stútfull og sungið verður undir borðhaldi. Að borðhaldi loknu verður dansað til klukkan tvö.

Á veglegu villibráðarhlaðborði Selaveislunnar er að finna marga rétti sem ekki er algengt að sjá á hlaðborðum þótt leitað sé með logandi ljósi um allan heim, segja þeir sem að veislunni standa. Þar verður á boðstólum:

• Grafin heiðagæs
• Reyktur makríll
• Villijurtargrafinn lax
• Birkikrydduð karrýsíld
• Hreindýrakæfa
• Reyktur lundi
• Engifermaríneraður hvalur
• Reyktur selur
• Hvalrengi
• Grilluð selapiparsteik
• Pipraðar hvalasteikur
• Glóðarsteikt fjallalamb með Madeirasósu
• Siginn fiskur, Vestfirðingur og selspik
• Léttsaltað uxabrjóst með hvítkálsjafningi

Miðasöluna annast Hallbjörn Bergmann í síma 848 6161.

Aðalfundur Samtaka selabænda var haldinn um síðustu helgi. Formaður er sem áður Pétur Guðmundsson frá Ófeigsfirði á Ströndum. Aðrir í stjórn eru Ásgeir Gunnar Jónsson og Kristinn Nikulásson og varamaður Guðmundur Jóhannesson.