Sýnishorn af réttunum í Bjarkalundi.

„Aðsókn hefur verið mjög góð á jóla- og villibráðarhlaðborðin sem hafa verið hér í Bjarkalundi síðustu tvær helgar“, segir Kolbrún Pálsdóttir hótelstýra. Hún segir að gestir hafi komið alls staðar frá og nefnir Mývatnssveit, Selfoss, Reykjavík, Borgarfjörð, Búðardal, Ísafjörð, Patreksfjörð og Bíldudal sem dæmi. „Gestirnir okkar hafa verið himinsælir með hlaðborðin og allan viðurgjörning, sem veitir okkur sem stöndum að þessu mikla gleði“, segir Kolbrún. Hún minnir jafnframt á, að núna á laugardagskvöld er komið að þriðja og síðasta jóla- og villibráðarhlaðborðinu í Bjarkalundi þetta árið. Gisting er fullbókuð en ennþá er laust án gistingar og hægt að panta miða.

Undanfarin ár hafa jóla- og villibráðarhlaðborðin í Bjarkalundi verið tvisvar en vegna sívaxandi vinsælda var ákveðið að hafa þau þrjú að þessu sinni. Aðsóknin hefur sýnt að sú viðbót átti fullan rétt á sér.

Í framhaldi af þessu er Hótel Bjarkalundur svo lagstur í dvala fram á vor.