Sigvaldi Guðmundsson (Valdi á Hafrafelli) áttræður
Sigvaldi Guðmundsson, jafnan kenndur við Hafrafell í Reykhólasveit (Valdi á Hafrafelli), er áttræður í dag. Hann fæddist 19. mars árið 1929 á Krossi á Skarðsströnd í Dalasýslu. Þar átti hann heima fyrstu ár ævi sinnar en er hann var þriggja ára fluttist hann með fjölskyldu sinni að Skógum í Þorskafirði. Þegar Valdi var á fjórða ári keyptu foreldrar hans Hafrafell í Reykhólahreppi og fluttust þau þangað.
Haustið 1949 kynntist Valdi verðandi eiginkonu sinni, Ölmu Dórótheu Friðriksdóttur. Eignuðust þau sex börn, en þau eru Olga, Dóróthea (Dóra), Haflína (Haffí), Marta, Guðmundur (Mummi) og Trausti. Valdi og Alma giftust 4. júlí 1970. Þau eiga nú þrettán barnabörn og sextán barnabarnabörn.
Þau hjónin voru með búskap á Hafrafelli þar sem þau ólu upp öll sín börn. Valdi vann við bústörfin en tók að sér ýmsa aukavinnu, eins og að gera við rafmagnstæki af nánast öllu tagi og var með dekkjaverkstæði. Hann var í stundavinnu hjá hreppnum, starfaði hjá Vegagerðinni, fór á sjó á Hvalfellinu og vann í ein 26 ár í sláturhúsinu í Króksfjarðarnesi.
Valdi og Alma fluttust á Dvalarheimilið Barmahlíð á Reykhólum fyrir liðlega þremur árum eða 3. mars 2006, þar sem þau búa nú.
Sigvalda er óskað til hamingju með daginn og öll 80 árin.
Guðrún Guðmundsdóttir, fimmtudagur 19 mars kl: 08:54
Til hamingju með daginn afi minn.
Kossar og knús frá okkur öllum.