Sjálfvirk veðurstöð er líka á Kletti í Geiradal
Eins og hér kom fram var fyrir skömmu sett upp veðurstöð í Flatey á Breiðafirði. Sams konar veðurstöð hefur verið á Kletti í Geiradal í Reykhólahreppi í nokkur ár og hefur nú verið settur tengill á mælingar frá henni hér á vefinn. Hún er hugsuð fyrst og fremst til gamans fyrir húsráðendur á Kletti en öðrum er velkomið að nýta sér upplýsingarnar.
Slóðin er http://www.alta.is/klettur en á þessum vef er hana að finna undir Veður og færð / Veðrið á Kletti í Geiradal í valmyndinni hér vinstra megin (eitthvað kann að verða hrært í skipulagi á þeim undirvef á næstunni).
Athugið, að þrátt fyrir að ný síða komi upp þegar smellt er á Veður og færð eru tenglar á veðurstöðvarnar í Flatey og á Kletti ekki á henni heldur birtast þeir vinstra megin fyrir neðan Veður og færð.
Hafa verður í huga að þótt stöðin hafi reynst vel er ekki hægt að ábyrgjast áreiðanleika upplýsinganna sem þar koma fram. Eins er rétt að hafa í huga að Klettur stendur nokkuð hátt eða í um 100 metra hæð yfir sjó og það getur haft áhrif á samanburð við veður á lægri svæðum.