Þórarinn Þorsteinsson.

Þórarinn Þorsteinsson (Tóti Þorsteins), sem andaðist 4. ágúst, var jarðsunginn í Reykjavík á föstudag. Rætur hans voru á Reykhólum. Þar var hann löngum í uppvextinum, þar var hann mjög lengi búsettur á fullorðinsárum og þar um slóðir er margt af fólki náskyldu og nátengdu honum. Hann var elstur barnabarna Steinunnar Hjálmarsdóttur á Reykhólum, sem mikill ættbogi er kominn af. Eftirlifandi kona Þórarins er Þórunn Játvarðardóttir frá Miðjanesi í Reykhólasveit. Börnum hennar fjórum gekk hann í föðurstað. Þau minntust hans af sérstakri hlýju í minningarorðum í Morgunblaðinu á útfarardaginn. Það gerðu líka fleiri af hans fólki.

Þórarinn fæddist 14. júlí 1947 og var því rétt orðinn 64 ára. Hann kenndi sér meins fyrr í sumar og baráttan við krabbameinið var stutt og snörp.

Mestan hluta ævinnar var Þórarinn sjómaður, bæði við fiskveiðar og farmennsku, og alltaf í góðum plássum. Þegar hann var búsettur á Reykhólum um langt árabil var hann meðal annars í áratug verkstjóri við þangöflun og gerði lengi út á grásleppu ásamt fjölskyldunni.

Í minningarorðum segja hjónin Hugo Rasmus, náfrændi Þórarins, og María Játvarðardóttir, mágkona hans:

„Tóti var listakokkur og hafði góðan smekk fyrir mat. Hann hafði unun af að sinna hlunnindum á Reykhólum með frændum sínum, tína egg og hirða dún. Honum fannst vorið komið þegar hann komst vestur í þessi störf og fékk egg að borða.“

Þórarinn Þorsteinsson var jarðsunginn frá Fríkirkjunni í Reykjavík. Prestur var sr. Hjörtur Magni Jóhannsson og við útförina voru sungin sjómannalög. Organisti var Gunnar Gunnarsson en söngvarar þeir Davíð Ólafsson og Stefán Stefánsson.

Sjá einnig og nánar:

Reykhólavefurinn 4. janúar 2009:  Tóti Þorsteins farinn að afgreiða í fiskbúð - aftur