Leikskólabörnin í Hólabæ á Reykhólum brugðu sér stutta bæjarleið, komu í heimsókn á Dvalarheimilið Barmahlíð og sungu nokkur lög fyrir heimilisfólkið við góðar undirtektir. Raunar mátti ekki á milli sjá hvor hópurinn hafði af þessu meira gaman, gestirnir eða heimilisfólkið. Í fylgd með börnunum voru Björg Karlsdóttir leikskólastjóri og Guðrún Guðmundsdóttir. Í hópnum var drengur sem þarna var að syngja fyrir langömmu sína og langafa - og raunar móður sína líka og móðursystur.

 

Það var Guðmundur Andri, sonur Guðrúnar sem vinnur á Hólabæ. Faðir hennar er Guðmundur Sigvaldason á Reykhólum en foreldrar hans eru Alma og Sigvaldi frá Hafrafelli í Reykhólasveit, sem búsett eru í Barmahlíð.

 

Upp rifjaðist það sem Steingrímur Thorsteinsson skáld kvað eitt sinn: Fögur sál er ávallt ung, undir silfurhærum.

 

Smellið á myndirnar til að stækka þær.