9. mars 2015 |
Skíði, sleðar, kakó, hundur og fleira uppi í Töglum
Myndir: Herdís Erna og Gústaf Jökull.
Veður var gott í Reykhólasveit í gær, sjaldan slíku vant þessar umhleypingasömu vikur. Fólk sammæltist á feisinu að skreppa áleiðis upp á Þorskafjarðarheiði um hádegisbilið til að njóta blíðunnar og snævarins og útiverunnar í hægri sunnanátt og hita rétt undir frostmarki. Margar fjölskyldur komu saman uppi í Töglunum með skíði og sleða og fleira til að renna sér á og sumir voru með vélsleða eða fjórhjól og allir skemmtu sér vel. Að sjálfsögðu var kakó og kaffi með í för og a.m.k. einn hundur.
Herdís Erna Matthíasdóttir og Gústaf Jökull Ólafsson á Reykhólum létu vefnum í té myndirnar sem fylgja frá þessari bráðhressandi útivist.