« 1 af 5 »

Félagsheimilið á Hólmavík hefur iðað af tónlist, lífi, leik og fjöri undanfarnar vikur, en þar hafa mætt ýmsar furðupersónur til að taka þátt í Skilaboðaskjóðunni. Þetta skemmtilega barnaleikrit með söngvum og spileríi verður frumsýnt kl. 14 á morgun, laugardag, og næsta sýning verður á sama tíma á sunnudag. Leikritið er eftir Þorvald Þorsteinsson og tónlist eftir Jóhann G. Jóhannsson og var frumflutt í Þjóðleikhúsinu 1993. Þessi uppsetning á Hólmavík er í samstarfi Grunn- og tónskólans á Hólmavík og Leikfélags Hólmavíkur.

Leikstjóri er Esther Ösp Valdimarsdóttir og tónlistarstjórn í höndum Hildar Heimisdóttur. Leikarar eru fjölmargir nemendur úr 8.-10. bekk Grunnskólans og einnig úr dreifnámi Fjölbrautaskóla Norðurlands vestra á Hólmavík.

Áhorfendur eru hvattir til að tryggja sér miða sem fyrst á þessa skemmtilegu sýningu. Sýningar fara fram í Félagsheimilinu á Hólmavík og verða sem hér segir:

• Frumsýning laugardaginn 5. apríl kl. 14.
• 2. sýning sunnudaginn 6. apríl kl. 14.
• 3. sýning miðvikudaginn 9. apríl kl. 19.
• 4. sýning páskadag 20. apríl kl. 19.
• Lokasýning 2. páskadag 21. apríl kl. 14.

Miðapantanir hjá Ester miðasölustjóra í síma 693 3474.

Myndirnar sem hér fylgja eru frá æfingum á Skilaboðaskjóðunni á Hólmavík.