Skipar samráðshóp um vegagerð í Reykhólahreppi
Ögmundur Jónasson ráðherra samgöngumála tilkynnti á fundi í Bjarkalundi í Reykhólasveit í gær, að hann hefði ákveðið að skipa samráðshóp sem leggja skal fram sem fyrst tillögur um leiðarval fyrir hinn umdeilda framtíðarveg um Gufudalssveit og Múlasveit í Austur-Barðastrandarsýslu (Reykhólahreppi). Hópurinn samanstandi af fulltrúum frá Reykhólahreppi, Vesturbyggð, Tálknafjarðarhreppi, Fjórðungssambandi Vestfirðinga (FV), ráðuneyti samgöngumála, náttúruverndarsamtökum og Vegagerðinni. Hópnum verður ætlað að skoða hlutina upp á nýtt með opnum huga og skoða allar leiðir, jafnt þær sem þegar liggja á borðinu og aðrar, að sögn Ingibjargar Birnu Erlingsdóttur, sveitarstjóra Reykhólahrepps.
Fundinn í Bjarkalundi í gær sátu, auk ráðherra, vegamálastjóra og föruneytis þeirra, oddviti og sveitarstjóri Reykhólahrepps og fulltrúi hreppsins í samgöngunefnd FV ásamt fulltrúum úr stjórn og samgöngunefnd FV.
Nefndin sem skipuð verður skal vinna hratt og örugglega með það markmið að komast að niðurstöðu um hagkvæma leið sem sátt verður um. Fyrsti fundur er þegar boðaður í ráðuneytinu 11. ágúst. Ráðherra leggur áherslu á að málið verði til lykta leitt núna í haust enda samgönguáætlun í vinnslu. Stefnt er að því að tillaga um leiðarval verði sett inn í samgönguáætlun sem lögð verður fyrir Alþingi í haust.
„Ég tel að fólk hafi verið sátt við tillöguna um skipan þessarar nefndar, sátt við að nýtt ferli sé hafið og þar fái allir hagsmunaaðilar að koma að borðinu“, segir Ingibjörg Birna Erlingsdóttir sveitarstjóri.
Á vef innanríkisráðuneytisins í dag segir:
„Sem kunnugt er hefur lengi staðið fyrir dyrum að endurbæta Vestfjarðaveg nr. 60, einkum kaflann á milli Vatnsfjarðar og Þorskafjarðar þar sem er um fjallvegi að fara og vegir illfærir og erfiðir yfirferðar. Hafa síðustu verkefnin á því sviði einkum verið á kafla milli Vatnsfjarðar og Kollafjarðar þar sem unnið er að uppbyggingu heilsársvega. Á austasta hluta þessarar leiðar, milli Þorskafjarðar og Gufufjarðar, eru erfiðustu hjallarnir og þar hafa verið uppi nokkrar hugmyndir um framtíðarvegstæði, meðal annars á láglendi með þverun fjarða. Slík vegarlagning hefur mætt andstöðu og ekki fengist samþykkt í umhverfismati og var með dómi Hæstaréttar haustið 2009 dæmd ólögmæt sú ákvörðun þáverandi umhverfisráðherra að heimila vegarlagninguna.
Fjórðungssamband Vestfirðinga og sveitarstjórnir Vesturbyggðar, Tálknafjarðar og Reykhólahrepps hafa mælt sterklega fyrir láglendisleið og hafa ítrekað ályktað um nauðsyn þess að fá ákvörðun um framtíðarlegu vegarins og að framkvæmdir hefjist.“
Í samtali við fréttavefinn visir.is í dag segir Ögmundur Jónasson Vestfirði vera ólíka öðrum landshlutum að því leyti að þar eigi enn eftir að tryggja lágmarkssamgöngur.
Mest aðkallandi segir ráðherra að ljúka Vestfjarðavegi um Barðastrandarsýslu og höggva á þann hnút sem er vegna deilna um Teigsskóg við Þorskafjörð í Reykhólahreppi. Ráðherrann hvetur til þess að allir komi fordómalaust og með opnum huga að borðinu og segir að það kosti einnig mikið rask að endurbyggja veginn yfir hálsana tvo, Hjallaháls og Ódrjúgsháls. „Það mun kosta verulegt rask og við verðum að horfast í augu við það líka.“
Ögmundur útilokar því ekki að veglínan verði um hinn umdeilda Teigsskóg og þvert yfir Djúpafjörð og Gufufjörð. „En að sjálfsögðu göngum við ekki gegn umhverfismati. Það gerum við ekki. Hvort það sé nauðsynlegt að ráðast í umhverfismat, þar sem heildardæmið er gert upp á nýjum forsendum - það er eitthvað sem við þurfum einfaldlega að skoða“, segir ráðherrann.
Meðfylgjandi myndir sendi Jóhannes Tómasson upplýsingafulltrúi ráðuneytisins vef Reykhólahrepps til birtingar.
Fyrri myndin er tekin á fundinum í Bjarkalundi í gær. Talið frá vinstri: Aðalsteinn Óskarsson, framkvæmdastjóri Fjórðungssambands Vestfirðinga, Gústaf Jökull Ólafsson, fulltrúi Reykhólahrepps í samgöngunefnd Fjórðungssambands Vestfirðinga, Magnús Valur Jóhannsson, svæðisstjóri Vegagerðarinnar á Norðvestursvæði, og Ögmundur Jónasson innanríkisráðherra. Á síðari myndinni eru málin rædd í Teigsskógi við Þorskafjörð.