Skjöldur Eyfjörð.

Skjöldur Eyfjörð kemur í heimsókn vestur á gamlar slóðir og heldur tónleika í Reykhólakirkju annað kvöld, sunnudagskvöld. Á efnisskránni verða íslensk dægurlög, enskar ballöður og jólalög, allt í ljúfari og fallegri kantinum. „Ég hlakka rosalega til að koma og syngja á staðnum þar sem ég byrjaði að syngja", segir Skjöldur. „Þarna ólst ég upp og fólkið mitt er þarna úr sveitinni. Ég byrjaði að syngja í þessari kirkju þegar ég var lítill og það er ekki heppilegri staður til að halda fyrstu tónleikana en einmitt þar. Ég elskaði að fara í kirkjuna þegar ég var lítill og fór í allar messur og í sunnudagaskólann vegna tónlistarinnar. Þegar ég kem að Reykhólum, þá er ég að koma heim."

Tónleikarnir hefjast kl. 20.30. Miðaverð er kr. 1.000 en því miður er ekki hægt að taka við kortum.