Reykhólar. Mynd: Árni Geirsson. Sjá ótal fleiri myndir undir Ljósmyndir > Ýmis myndasöfn í valdálkinum vinstra megin.

Í ósamþykktum drögum að skólastefnu Reykhólahrepps kemur fram, að stefnt skuli að sameiningu Grunnskólans á Reykhólum (Reykhólaskóla) og Leikskólans Hólabæjar á Reykhólum. Á síðasta fundi mennta- og menningarmálanefndar var þetta mál rætt samkvæmt ósk formanns nefndarinnar, Eiríks Kristjánssonar. Bókað var að fram hafi komið að forsendur yrðu að vera góðar, bæði fjárhagslega og faglega. Bókun nefndarinnar var tekin fyrir á fundi hreppsnefndar Reykhólahrepps í gær og þar var skrifstofu hreppsins falið að gera kostnaðaráætlun varðandi launaþátt sameiningar.

Fyrir tæpu ári var ákveðið að kalla saman stýrihóp til að vinna að skólastefnu Reykhólahrepps. Í hópnum eiga sæti Eiríkur Kristjánsson f.h. hreppsnefndar, Eyvindur Svanur Magnússon f.h. Foreldrafélags Reykhólaskóla, Katla Tryggvadóttir f.h. Foreldrafélags Hólabæjar, Áslaug Berta Guttormsdóttir f.h. starfsmanna Reykhólaskóla og Íris Ósk Sigþórsdóttir f.h. starfsmanna Hólabæjar. Verkefnið sem hópnum var falið er að vinna að skólastefnu fyrir Reykhólahrepp, vinna að reglum og verklagi innan skólanna og skoða kosti og galla á sameiningu skólanna.

Minnt skal á, að fundargerðir hreppsnefndar og undirnefnda sveitarfélagsins er að finna í reitnum Fundargerðir neðst til vinstri hér á vef Reykhólahrepps.