Í framhaldi af samtali við Sigurð Atlason, formann Ferðamálasamtaka Vestfjarða („Gengur ekki að loka um miðjan ágúst“) vill Dóróthea í Skriðulandi taka fram, að verslunin og veitingastaðurinn Skriðuland í Saurbæ eru með opið frá níu á morgnana til tíu á kvöldin fram eftir hausti. „Ennþá er á ferðinni mikið af bæði erlendum og innlendum ferðamönnum, miklu meira en undanfarin ár, og það er nauðsynlegt að veita þeim þjónustu. Fyrir nú utan það að Breiðafjarðarferjan Baldur verður fjarri góðu gamni í tvær vikur í seinni hluta þessa mánaðar vegna afleysingasiglinga til Vestmannaeyja og þá verður miklu meiri umferð hér í gegn", segir Dóróthea.

 

Því má bæta við, að jólapostulínið er komið í Skriðuland þó að september sé rétt að byrja.