Allis-Chalmers - notaleg sjón fyrir suma.

Gauti Eiríksson frá Stað tók upp myndskeið af ýmsum viðburðum á Reykhóladögum og setti á YouTube. Hér fyrir neðan er tengill á eitt þeirra, hópakstur gömlu dráttarvélanna um Reykhólaþorp með jeppa Björgunarsveitarinnar Heimamanna í broddi fylkingar og lögreglubíl á eftir lestinni, báða með bláu ljósin blikkandi. Tegundir vélanna komu hver fyrir sig í röð, fyrst Farmall-traktorar, svo Fergusynir, því næst Deutz o.s.frv. Loks komu nokkrar vélar af tegundum sem voru fremur sjaldséðar hérlendis, þar á meðal einn Allis-Chalmers (amerískur).

Gaman þótti umsjónarmanni þessa vefjar að sjá Chalmersinn, því að á einmitt svona traktor byrjaði hann að vinna fulla vinnu vorið 1954 eða fyrir liðlega sextíu árum.

Síðastur í röðinni í skrúðgöngu dráttarvélanna var þó sérstæðasti traktorinn í þessum hópi, þýskur af gerðinni Lanz Alldog. Skegg ökumannsins vakti líka verðskuldaða athygli. Löggan sem fylgdi á eftir hélt sig í hæfilegri fjarlægð frá Lanzinum - af næsta augljósum ástæðum.

Eitthvað var um framúrakstur líkt og í Formúlu 1. Þar áttu a.m.k. í hlut þeir Magnús Sigurgeirsson og Jón Atli Játvarðarson, sem báðir voru á þokkalega sprækum Fergusonum. Ekki kom þó til þess að löggan tæki þá fyrir of hraðan akstur.

Tenglar á mörg fleiri myndskeið Gauta Eiríkssonar frá Reykhóladögum koma hér inn á Reykhólavefinn síðar í dag. Í kvöld eða í fyrramálið er síðan væntanleg syrpa með á annað hundrað ljósmyndum.

► Hópakstur dráttarvélanna á Reykhóladögum 2014 (YouTube)

Þessu tengt:

► Fólksfjöldinn á Reykhólum margfaldaðist