Séð yfir Innsveitina í Reykhólahreppi. Ljósm. Árni Geirsson.

Frá því í byrjun nóvember hafa Bændasamtök Íslands og Búnaðarfélag Reykhólahrepps verið í samstarfi við að prófa gagnsemi gátlista um „Áætlun um öryggi og heilbrigði við landbúnaðarstörf“. Starfsmaður frá Bændasamtökunum heimsótti 26 bæi í Reykhólahreppi í byrjun nóvember og var svo aftur á ferðinni nálægt síðustu mánaðamótum og safnaði þá saman athugasemdum sem komu í ljós við útfyllingu gátlistanna.

„Markmiðið með þessu verkefni er að auka öryggi og fækka slysum og óhöppum í og við landbúnaðarstörf. Það er raunar skylda allra atvinnurekanda að framkvæma þannig áhættumat á sínum vinnustað,“ segir Hjörtur Leonard Jónsson hjá Bændasamtökunum.

Samkvæmt skoðanakönnun sem gerð var árið 2004, þar sem rúmlega 1.100 býli með meira en 100 ærgildi svöruðu, höfðu 18,3% svarenda verið frá vinnu í meira en 14 daga árið á undan vegna slysa í og við landbúnaðarstörf.

► Sjá hér ýmislegt efni sem þetta varðar (vefur Bændasamtaka Íslands)