Snæfellsjökull eða Snæfellsskafl?
Eitthvað virðist Snæfellsjökull misjafn ásýndum, allt eftir því hvaðan horft er á hann. Nema þá að hann hafi bráðnað gríðarlega núna allra síðustu daga. „Ljósmyndari sem var á ferð við jökulinn á föstudag segir hann minna meira á snjóskafl í dag heldur en jökul", segir á mbl.is í dag og með fylgir ljósmynd til sannindamerkis. Hér er aftur á móti endurbirt ljósmynd sem tekin var á Reykhólum á mánudaginn, eða fjórum dögum fyrr. Er þetta sama fjallið, er þetta sami jökullinn, er þetta sami skaflinn?
Fréttin á mbl.is er á þessa leið:
„Mikið hefur verið fjallað um áhrif hækkandi hitastigs á bráðnun jökla og ljóst er að Snæfellsjökull hefur látið mikið á sjá að undanförnu. Ljósmyndari sem var á ferð við jökulinn á föstudag segir hann minna meira á snjóskafl í dag heldur en jökul.
Í síðustu viku var kynnt skýrsla vísindanefndar um loftslagsbreytingar á Íslandi, en þar kom m.a. fram að allir jöklar landsins hafi hopað frá árinu 1995 og muni hopa ört alla 21. öldina.
Fyrir rúmri viku síðan varaði landvörður í þjóðgarðinum Snæfellsjökli við ferðum upp á jökulinn, sem er orðinn mjög sprunginn og blautur svo hætta getur stafað af. Ástæðuna má líklega rekja til mikilla sumarhita en talsverð sólbráð hefur verið undanfarið og því opnast sprungur á jöklinum sem gera hann erfiðan yfirferðar. Fyrirtækið Snjófell hefur hætt við frekari skipulagðar vélsleðaferðir á jökulinn í sumar af þessum sökum.
Í frægri sögu rithöfundarins Jules Verne, Leyndardómar Snæfellsjökuls, er jökullinn sagður geyma innganginn að miðju jarðar. Haldi jökullinn áfram að hopa má eflaust gera ráð fyrir að inngangurinn muni brátt koma í ljós.“
Svona má ljúga jafnvel með ljósmyndum. Efalítið er hægt að komast einhvers staðar að rótum Vatnajökuls og taka mynd þannig að ekkert sjáist nema svo sem ein fönn ...