Gömul mynd frá veginum yfir Þorskafjarðarheiði.

Ekki hefur verið tekin ákvörðun um snjómokstur á Þorskafjarðarheiði. Jón Hörður Elíasson, rekstrarstjóri Vegagerðarinnar á Hólmavík, segir í samtali við fréttavefinn bb.is að heiðin hafi verið skoðuð á mánudag og enn sé þar talsverður snjór. „Þetta er mikið seinna á ferðinni en undanfarin ár. Við mokuðum í endaðan maí í fyrra. Það hefur verið svo kalt og bráðnunin hæg en það er ekki mikið sem vantar upp á svo við getum farið að moka,“ segir hann.