Nýja peruorkureiknvélin.

Í framhaldi af nýafstaðinni Staðardagskrárráðstefnu þykir rétt að benda á reiknivélarnar, sem komið hefur verið fyrir á heimasíðu Orkuseturs. Fyrir skömmu var sett þar upp sérstök reiknivél, þar sem hægt er að skoða með auðveldum hætti áhrif þess að skipta út glóperum fyrir sparperur. Eins og fram kemur á heimasíðunni má ætla „að þessi reiknivél hvetji neytendur mjög til að skipta yfir í orkuminni lýsingu með tilheyrandi rekstrarsparnaði fyrir heimilið".

Aðrar reiknivélar Orkuseturs má finna undir tenglinum Reiknivélar í vinstri jaðri fyrrnefndrar síðu.

„Við hvetjum ykkur öll til að nýta ykkur þessi tæki, hvort sem er í eigin heimilishaldi eða í rekstri sveitarfélaga og fyrirtækja. Þau afnot eru alveg ókeypis - og líkleg til árangurs", segir Stefán Gíslason, verkefnisstjóri Staðardagskrár 21 og umhverfisstjórnunarfræðingur.