Starfsár Lions hafið með sameiginlegum fundi
Fyrsti fundur Reykhóladeildar Lions á þessu starfsári var haldinn í Bjarkalundi á föstudagskvöldið ásamt Lionsklúbbi Búðardals, en hefðbundið er að starfið byrji á haustin með sameiginlegum fundi vestan Gilsfjarðar. Félagsfólk í Lions skiptist á að gegna formennsku og öðrum stjórnarstörfum. Að þessu sinni tók Guðmundur Ólafsson á Grund við formennsku Reykhóladeildarinnar af Karli Kristjánssyni á Kambi og varð þar með formaður í annað sinn.
Lionsklúbbur Búðardals var stofnaður árið 1963 en Reykhóladeild Lions var stofnuð fyrir nær réttum tólf árum eða 5. nóvember 1999. Hún er deild í Búðardalsklúbbnum en með sjálfstæða stjórn og sjálfstæðan fjárhag.
Næsti sameiginlegi fundur Dalafólks og Reykhólafólks í verður í Búðardal í janúar þar sem Lionsfélagar eta þorramat og skemmta sér í anda þorrablótanna. Í byrjun mars verður sameiginleg hefðbundin saltkjötsveisla og skáldakynning á Reykhólum. Starfinu lýkur síðan í endaðan apríl með samkomu sem Dalamenn sjá um.
Að öðru leyti starfar Reykhóladeildin sjálfstætt og heldur reglulega fundi út af fyrir sig. Félagar í Reykhóladeildinni eru 17. Andinn í starfi Lionshreyfingarinnar er að bæta og styrkja sitt samfélag, afla fjár til að láta gott af sér leiða og vinna að velferð byggðarlagsins. Og jafnframt, að sjálfsögðu, að hittast í góðra vina hópi sér til upplyftingar.
Núverandi stjórn Reykhóladeildar Lionsklúbbs Búðardals er þannig skipuð:
- Formaður Guðmundur Ólafsson
- Ritari Þórarinn Ólafsson
- Gjaldkeri Eyvindur S. Magnússon
- Siðameistari Matthías Ólason
- Stallari Guðjón D. Gunnarsson
Meðfylgjandi myndir tók einn af félögunum í Reykhóladeildinni, Þórarinn Ólafsson í Stekkjarlundi, - og þess vegna er hann af skiljanlegum ástæðum ekki á neinni þeirra. Smellið á myndirnar til að stækka þær. Vegna þess hve sumir myndatextanna eru langir eru þeir allir hér fyrir neðan en ekki undir myndunum sjálfum.
Mynd nr. 1
Viðtakandi formaður Reykhóladeildarinnar, Guðmundur á Grund, afhendir fráfarandi formanni, Karli á Kambi, gjöf frá Lionsklúbbnum, áritaðan skjöld í tilefni af fimmtíu ára afmæli hans núna í haust. Vinstra megin á myndinni er Eyvindur gjaldkeri Reykhóladeildarinnar en hægra megin er Jón Egilsson formaður Lionsklúbbs Búðardals.
Mynd nr. 2
Svanhildur Sigurðardóttir og Tómas Sigurgeirsson Reykhólabændur ásamt Erlingi Jónssyni á Reykhólum.
Mynd nr. 3
Guðjón D. Gunnarsson á Reykhólum, betur þekktur sem Dalli, sæmdur viðurkenningu frá Lionshreyfingunni fyrir góðan árangur við að fjölga Lionsfélögum.
Mynd nr. 4
Við háborðið eru Eyvindur viðtakandi gjaldkeri og Guðmundur viðtakandi formaður Reykhóladeildar ásamt Karli fráfarandi formanni og stjórn Lionsklúbbs Búðardals: Jón Egilsson á Sauðhúsum formaður, Sveinn Gestsson á Staðarfelli gjaldkeri og Bogi Kristinsson í Búðardal ritari. Við borðið nær eru Sæmundur Jóhannsson í Búðardal, Hörður á Tindum, Magnús á Seljanesi, Dalli á Reykhólum, Ingvar Bæringsson og Guðmundur í Geirshlíð.
Mynd nr. 5
Eyvindur Svanur Magnússon gjaldkeri og Guðmundur Ólafsson formaður Reykhóladeildarinnar.
Mynd nr. 6
Sveinn Gestsson og Bogi Kristinsson.
Mynd nr. 7
Jón Egilsson formaður Lionsklúbbs Búðardals flytur ræðu.
Mynd nr. 8
Jóhannes Haukur Hauksson ostameistari í Búðardal og eigandi að Grímsstöðum á Fjöllum fer með gamanmál, aðallega frumsamið efni í bundnu máli.
Mynd nr. 9
Karl Kristjánsson á Kambi flytur ljóð úr bókinni Saltkorn í mold eftir Guðmund Böðvarsson skáld á Kirkjubóli í Hvítársíðu.
Mynd nr. 10
Málin rædd með óformlegum hætti.
Mynd nr. 11
Þrír gestir sem komu með Tómasi á Reykhólum spjalla við Guðbrand bónda í Sólheimum í Laxárdal.
Mynd nr. 12
Jóhannes Haukur Hauksson og Ingvar Bæringsson á barnum.
Mynd nr. 13
Sæmundur, Hörður, Maggi, Guðmundur, Ingvar, Dalli og Jóhannes Haukur.
Mynd nr. 14
Létt yfir mannskapnum líkt og venja er þegar Lionsfélagar koma saman.