Samgönguráðherra hefur ákveðið að skipa starfshóp til að hefja undirbúning við nýjan veg um Dynjandisheiði og á hann að taka til starfa með haustinu. Þetta kemur fram á vef samgönguráðuneytis. Verkefni hópsins verður að fara yfir athuganir og hugmyndir sem þegar liggja fyrir og standa fyrir nauðsynlegum viðbótarrannsóknum og úttektum til að unnt verði að leggja fram tillögur um gerð og legu vegarins. Gert yrði ráð fyrir varanlegu og heilsárs vegarsambandi.

 

Verkinu skal haga þannig að Vegagerðin geti lokið hönnun, mati á umhverfisáhrifum og öðrum nauðsynlegum undirbúningi nógu tímanlega til að unnt verði að hefja framkvæmdir í beinu framhaldi af gerð jarðganga milli Dýrafjarðar og Arnarfjarðar.

 

Vegagerðinni er falið að stýra verkefninu og tilnefna þrjá fulltrúa í hópinn og farið hefur verið fram á að Fjórðungssamband Vestfirðinga skipi tvo fulltrúa í hópinn.

 

Varðandi þetta mál skrifar Ómar Ragnarsson eftirfarandi pistil á bloggi sínu 6. ágúst undir fyrirsögninni Hvað um yfirbyggða kafla?

 

„Þeir sem fljúga yfir Dynjandisheiði oft að vetrarlagi sjá vel að hún verður ævinlega ófær á ákveðnum köflum en vegurinn stendur að mestu upp úr snjónum að öðru leyti.

 

Ef ekki verða gerð göng milli Arnarfjarðar og dalsins inn af Vatnsfirði (þau yrðu álíka löng og Héðinsfjarðargöng) er næstbesti kosturinn að gera þá kafla á Dynjandisheiði, sem alltaf verða ófærir, þannig úr garði að úr geti orðið heilsársvegur.

 

Reyndar átti að vera búið að koma á heilsárssambandi milli Ísafjarðar, Patreksfjarðar, Barðastrandar og Reykjavíkur fyrir löngu en það er önnur saga af röngum ákvörðunum allt frá því fyrir 40 árum.

 

Ég flutti frétt í Sjónvarpinu fyrir um áratug af yfirbyggðum vegum erlendis, sem voru þá mun ódýrari á kílómetra en jarðgöng og minntist sérstaklega á Dynjandisheiði í því sambandi. Með það var ekkert gert en slíkan möguleika álít ég að þurfi að athuga ekki síður en breytingar á veginum.“