Stefnt að því að húsið verði fokhelt í næsta mánuði
„Við höfum verið heppnir með veður og þetta hefur gengið ágætlega“, segir Eiríkur Kristjánsson húsasmíðameistari á Reykhólum, en þessa dagana er verið að reisa límtrésgrindina að húsi Íslenska saltfélagsins ehf. við Reykhólahöfn. „Við stefnum á að klára núna í vikunni að reisa grindina og setja þakið á, þó að það velti auðvitað eitthvað á veðri. Síðan er stefnt að því að húsið verði orðið fokhelt núna í febrúar.“
Efnið í burðarvirkið kom á staðinn í fyrradag og þá eftir hádegið var hafist handa. Efnið í þakið og veggina kom í gær, þannig að allt er komið sem tilheyrir límtrésvinnunni. Húsið verður 540 fermetrar á steyptum grunni. Vinnan við grunninn hófst í byrjun desember.
Eiríkur er meistari að húsinu en þessa dagana eru til aðstoðar sérfræðingar í límtrésbyggingum, Kári Arnórsson byggingaverktaki í Reykjavík (eiginkona hans er reyndar upprunnin í Reykhólasveit) og tveir menn með honum.
Myndirnar sem hér fylgja voru teknar í dag. Á fyrstu myndinni eru fremst f.v. hinn rammbreiðfirski húsasmiður og skipasmíðameistari Hafliði Aðalsteinsson, síðan Eiríkur Kristjánsson og Kári Arnórsson, en í kranahúsinu má grilla í Guðlaug Theodórsson á Reykhólum.
Sjá nánar:
► 04.12.2012 Bygging saltvinnslu á Reykhólum hafin
► 18.12.2012 Íslenska saltfélagið á Reykhólum í fréttum Stöðvar 2