Fuglaskoðarar á vettvangi.

Fundur þar sem stefnt er að stofnun Landssambands aðila í fuglaskoðunarferðamennsku verður haldinn í Sögumiðstöðinni í Grundarfirði annað kvöld, fimmtudagskvöld, og hefst kl. 20. Sagt verður frá stöðu fuglaskoðunar og aðkomu Útflutningsráðs að þessu verkefni. Björn Reynisson fjallar um fuglaskoðun á Vesturlandi, Jóhann Óli Hilmarsson segir frá innsýn söluaðila í verkefnið og Hrafn Svavarsson hjá Gavia Travel heldur tölu, sem og Pétur Ágústsson hjá Sæferðum. Umræður verða að loknum fyrirspurnum.

Fundurinn er framhald fundar sem Útflutningsráð hélt í vetur með það markmið að stofna Landssamband aðila í fuglaskoðunarferðamennsku. Fulltrúi Vesturlands í stjórn þeirra verður valinn á fundinum. Frá þessu greinir á vef Skessuhorns.