Fjárrétt á Lambaréttarnesi við Kollafjörð. Nánar í meginmáli.

Hreppsnefnd Reykhólahrepps samþykkti á fundi sínum í vikunni stofnun fjallskilasjóðs en frestaði ákvörðun um tekjustofna hans meðan frekari upplýsinga væri aflað. Þetta var ákveðið þegar nefndin fjallaði um bókun á fundi fjallskilanefndar Reykhólahrepps daginn áður. Í fjallskilasamþykkt fyrir Barðastrandar- og Ísafjarðarsýslur sem ráðuneyti landbúnaðarmála staðfesti í haust er mælt fyrir um slíkan sjóð.

Í bókun fjallskilanefndar Reykhólahrepps segir:

• Nefndin leggur til [við hreppsnefnd] að stofnaður verði fjallskilasjóður fyrir árið 2013. Tekjur sjóðsins skuli vera 2% af landverði jarða í Reykhólahreppi og 50 kr. á hverja veturfóðraða kind auk andvirðis óskilafjár.
• Nefndin leggur til að fyrsta verkefni fjallskilasjóðs verði viðhald á Kinnarstaðarétt árið 2013. Nefndin óskar eftir því að sveitarstjórn geri ráð fyrir fjármagni í verkefnið.

Eins og áður segir samþykkti hreppsnefnd að þessu sinni einungis að sjóðurinn verði stofnaður en frestaði ákvörðun um aðra þætti í bókun fjallskilanefndar.

Fundargerðir hreppsnefndar Reykhólahrepps og undirnefnda hans er að finna í reitnum Fundargerðir hér neðst til vinstri á vefsíðunni.

Myndin sem hér fylgir er úr nýútkominni byggðarsögu um Gufudalshrepp, Þar minnast fjöll og firðir (fæst m.a. í Hólakaupum á Reykhólum). Fjárrétt þessi er á klettatanganum Lambaréttarnesi skammt utan við Kleifarstaðamel yst við Kollafjörð að austanverðu. Naumast þarf að taka fram, að hún er ekki notuð lengur en stendur nú sem minnisvarði um liðna tíð.

► Fjallskilasamþykkt fyrir Barðastrandar- og Ísafjarðarsýslur