Stórtjón á „byggð“ í Flatey
Annasamt var í kulda og trekki í Flatey á Breiðafirði helgi eina fyrir skömmu. Unnið var að flutningi á vatnslögn og vatnsmastri á bryggjunni þannig að tengingar passi við nýja Baldur. Hvasst var alla helgina og frost og lentu einhverjir í vandræðum með að halda hita á húsum. Frá þessu er greint á hinum nýja vef Framfarafélags Flateyjar.
Þar er einnig greint frá því (í frétt undir fyrirsögninni hér fyrir ofan), að í einhverju stórviðrinu í vetur hefur orðið stórtjón á byggingum sem ungir og athafnasamir Flateyingar hafa reist við Lómatjörnina. Heilu húsin hafa tekist á loft og spundrast eða fokið í tjörnina.
Sérstök athygli skal hér vakin á bloggpistli eftir Hilmar Þór Björnsson arkitekt, Svefneying og Myllustaðabónda, Arkitektúr án arkitekta, um byggð ungmennana (ásamt myndum af byggingunum), en tengill í hann er í fréttinni á vef félagsins. Hilmar Þór skrifar reglulega pistla á Eyjuna undir yfirskriftinni Arkitektúr, skipulag og staðarprýði.
Myndirnar sem hér fylgja eru af vef Framfarafélags Flateyjar.