Stungu af án þess að borga fyrir gistinguna
Menn úr Björgunarsveitinni Heimamönnum í Reykhólahreppi og Björgunarsveitinni Dagrenningu á Hólmavík fóru fyrir nokkru (17. des.) upp á Þröskulda til aðstoðar fólki sem sat þar fast í þremur bílum. Fólkið var flutt á gististað hjá Ferðaþjónustunni Þurranesi í Saurbæ en bílarnir skildir eftir. Þegar kom fram á morgun daginn eftir kom í ljós að fólkið var farið frá Þurranesi og hafði fengið far til að sækja bílana. Í einum bílnum var par sem kom svo aftur og gerði upp gistinguna en fólkið í hinum bílunum lét aldrei sjá sig né heldur heyra frá sér.
„Maður bara skilur þetta ekki,“ segir segir Brynjólfur Víðir Smárason, formaður Björgunarsveitarinnar Heimamanna. „Þarna eru menn úr tveimur björgunarsveitum búnir í sjálfboðavinnu að bjarga fólki í vandræðum, og svo er ekki einu sinni hægt að borga fyrir gistinguna sem búið var að kaupa, heldur stungið af. Þetta er ekki bara leiðinlegt, þetta er ljótt,“ segir Brynjólfur.
Carl Jóhann Lilliendahl, sunnudagur 29 desember kl: 09:14
Gott fólk.
Ljótt að heyra þetta. - Voru þetta Íslendingar sem létu sig hverfa sona?
Kær kveðja og gleðileg jól og nýtt ár,
- Carl Jóhann Lilliendahl.