Séð yfir hluta Flateyjar á Breiðafirði. Ljósm. Árni Geirsson 2012.

Sveitarstjórn Reykhólahrepps staðfesti á fundi sínum í gær samþykkt skipulagsnefndar þess efnis, að sveitarfélagið veiti 200 þúsund króna styrk til fornleifarannsókna í Flatey. Styrkurinn er veittur samkvæmt beiðni Björns Samúelssonar á Reykhólum fyrir hönd Fornleifafélags Barðstrendinga og Dalamanna. Björn hefur veitt félaginu forstöðu allt frá stofnun þess fyrir mörgum árum.

Það skilyrði er sett fyrir fjárveitingunni, að sveitarstjórn fái í staðinn aðgang að gögnum varðandi rannsóknina í tengslum við vinnu við aðalskipulag Reykhólahrepps.

Á liðnum árum hefur Fornleifafélag Barðstrendinga og Dalamanna staðið fyrir mörgum rannsóknum sérfræðinga í byggðum héraðsins. Sjá hér ýmis af þeim gögnum og niðurstöðum rannsókna.