Orkuráð hefur ákveðið að veita Arnóri Hreiðari Ragnarssyni fimm milljóna króna styrk til framhaldsleitar að jarðhita í landi Hofsstaða í Reykhólasveit. Ráðið veitir að þessu sinni fjóra aðra jafnháa styrki til jarðhitaleitar. Í tilkynningu frá iðnaðarráðuneyti segir, að megintilgangurinn með styrkjunum sé að stuðla að enn frekari nýtingu jarðvarma til húshitunar í landinu. Tilgangurinn sé að bæta búsetuskilyrði og auka aðgengi að þeim möguleikum sem nýting jarðhita hefur í för með sér, draga úr notkun jarðefnaeldsneytis til húshitunar og jafnframt að draga úr kostnaði ríkissjóðs vegna niðurgreiðslu húshitunarkostnaðar. Styrki þessa má veita sveitarfélögum, fyrirtækjum og einstaklingum.

 

Auk Arnórs á Hofsstöðum fá eftirtaldir styrki: Hörgársveit við Eyjafjörð til leitar í Hörgárdal og Öxnadal í samstarfi við Íslenskar orkurannsóknir og Norðurorku; Jón Svavar Þórðarson til framhaldsleitar að jarðhita í landi Ölkeldu í Staðarsveit á Snæfellsnesi; Orkuveita Staðarsveitar til framhaldsleitar að jarðhita á Lýsuhóli í Staðarsveit á Snæfellsnesi; Steinþór Tryggvason til lokaáfanga jarðhitaleitar í landi Kýrholts í Viðvíkursveit í Skagafirði.

 

Búast má við að leit hefjist á þessum stöðum með vorinu.

 

Mynd nr. 2 er frá borun fyrstu tilraunaholunnar á Hofsstöðum við Þorskafjörð sumarið 2008.

 

Sjá einnig:

28.07.2008  Tilraunaboranir eftir heitu vatni hafnar við Þorskafjörð

10.06.2008  Fjárveiting til leitar að heitu vatni í landi Hofsstaða