Þessi misserin stendur yfir þriggja anna nám í svæðisleiðsögn hjá Fræðslumiðstöð Vestfjarða, sem lýkur á næsta vori. Næsta lota fer fram á Reykhólum núna um helgina og mun þá m.a. Einar Örn Thorlacius fyrrv. sveitarstjóri Reykhólahrepps fræða nemendur um Austur-Barðastrandarsýslu, þ.e. Reykhólahreppinn.

 

Einar á reyndar sjálfur ættir að rekja í sýsluna, því móðuramma hans var fædd í Flatey árið 1889. „Þessi sýsla er afar spennandi svæði og sérstaklega Breiðafjarðareyjarnar. Ég er ekki viss um að allir geri sér grein fyrir því að árið 1900 bjuggu 400 manns á sjö pínulitlum eyjum á Breiðafirði, þ.e. í Flateyjarhreppi hinum forna. Þéttbýlið var í raun eitt hið mesta á landinu og samgöngur á sjó miklu auðveldari en að ríða á hestum yfir fjöll og hálsa. Þetta skapaði einstakt menningarsamfélag og því mun ég koma á framfæri í kennslunni“, segir Einar.

 

Umsjón með náminu hefur Kristín Sigurrós Einarsdóttir, verkefnastjóri á Hólmavík. Um 30 manns víða af landinu eru skráðir á námskeiðið. Kennslan fer m.a. fram í helgarlotum víðs vegar um svæðið.