Eins og fram hefur komið í fréttum eru skiptar skoðanir á hinum nýja búvörusamningi og hafa meðal annars tvö félög sauðfjárbænda á Vestfjörðum ályktað gegn honum. Fyrir nokkrum dögum var í RÚV rætt við Ebbu Gunnarsdóttur á Barkarstöðum eins og hér kom fram, en hún óttast að samningurinn gangi gegn því markmiði að efla nýliðun í sauðfjárrækt.

Útreikningar þeirra sauðfjárræktarfélaga sem hafa gagnrýnt samninginn eru byggðir á skýrslu sem Ráðgjafarmiðstöð landbúnaðarins gerði fyrir þau.

Þórarinn Ingi Pétursson, formaður Landssamtaka sauðfjárbænda, svaraði gagnrýni á samninginn í viðtali við Spegilinn á RÚV. Hann telur að skýrslan taki ekki tillit til mikilvægra þátta eins og stuðnings við svæði sem eru sérstaklega háð sauðfjárrækt. Þá verði að taka tillit til þess að í samningnum séu rauð strik sem geri kleift að taka upp ákveðin atriði, gangi hlutirnir ekki upp eins og stefnt sé að. Rauði þráðurinn í samningnum sé sá, að stefnt sé að auknu virði framleiðslunnar og þar með auknum tekjum bænda.

Hér má heyra viðtalið við Þórarin Inga á RÚV.