Séð yfir Svefneyjar. Ljósmynd og höfundarréttur: Mats Wibe Lund.

Svefneyjar á Breiðafirði, sem tilheyra Reykhólahreppi, eru til sölu. Þar eru tvö nýuppgerð íbúðarhús, allnokkur útihús og friðaður torfkofi, Ranakofinn. Svefneyjar eru fornfræg hlunnindajörð rétt austur af Flatey og skilur Flateyjarsund á milli. Þær eru skammt suðvestur af Hvallátrum og þar handan við eru Skáleyjar. Heimaeyjan í Svefneyjum er litlu minni en Flatey eða um hálfur annar kílómetri á lengd og allt upp í hálfan kílómetra á breidd. Fjöldi annarra smærri eyja, hólma og skerja tilheyrir Svefneyjum.

Hallsteinn Þórólfsson landnámsmaður og goði á Hallsteinsnesi milli Djúpafjarðar og Þorskafjarðar átti skoska þræla og sendi þá til saltgerðar í Svefneyjum, að því er Landnámabók greinir frá. Sagt er að Hallsteinn hafi komið að þrælunum sofandi þar sem síðan heitir Þrælalág og á leiðinni heim hafi hann komið við í Sviðnum og hengt þá þar fyrir vinnusvikin. Þórhallur Vilmundarson prófessor, sem ekki síst er þekktur fyrir náttúrunafnakenninguna svokölluðu og hefur dregið fjölmargar nafnaskýringar í Landnámu og öðrum fornritum í efa, telur ekki ólíklegt að Svefneyjar hafi hlotið nafnið vegna þess að þær svæfi hafölduna.

Eggert Ólafsson náttúrufræðingur og skáld (1726-1768), sem drukknaði í Breiðafirði, fæddist í Svefneyjum. Þjóðskáldið séra Matthías Jochumsson frá Skógum í Þorskafirði orti eitt af sínum kunnustu kvæðum um hinstu för Eggerts (hann ýtti frá kaldri Skor) og hans ungu brúðar. Þau voru þá á heimleið eftir vetursetu hjá mági Eggerts, séra Birni Halldórssyni í Sauðlauksdal við sunnanverðan Patreksfjörð.

Kunnasti stórbóndi í Svefneyjum fyrr og síðar er Eyjólfur Eyjajarl (Eyjólfur Einarsson), þingmaður Barðstrendinga á hinu endurreista Alþingi 1845 og tveim næstu þingum (1847 og 1849). Af honum er komin Svefneyjaætt.

Fasteignasalan Torg í Garðabæ er með Svefneyjar á söluskrá. Ljóst má vera, að enginn auraleysingi kaupir þetta mikla og merka óðal á Breiðafirði.

Á myndinni sér yfir Svefneyjar. Reykjanesfjall er fyrir miðri mynd. Þar fyrir framan yst til hægri eru Reykhólar en Þorskafjörður opnast vinstra megin. Smellið til að stækka.