„Kæru íbúar. Sú nýbreytni verður á Reykhóladögum að þessu sinni, að velja Sveitunga ársins í Reykhólahreppi. Þá geta sveitungar sent inn tilnefningu um íbúa í sveitarfélaginu sem sett hefur mark sitt á samfélagið á einn eða annan hátt. Tilnefna má fyrir gott og jákvætt framlag til samfélagsins síðastliðið ár eða á starfsævinni,“ segir Jóhanna Ösp Einarsdóttir, tómstundafulltrúi Reykhólahrepps og umsjónarmaður Reykhóladaga 2016.

Það sem þarf að koma fram í tilnefningu er:

• Hver er tilnefndur
• Fyrir hvaða störf
• Hver tilnefnir

Tilnefning sendist á netfangið johanna@reykholaskoli.is merkt Sveitungi ársins. Tekið verður við tilnefningum til kl. 22 þriðjudaginn 19. júlí.

„Þá er bara um að gera að horfa í kringum sig og sjá alla þessa frábæru hluti sem fólkið í sveitarfélaginu er að gera,“ segir Jóhanna Ösp.

Og hún bætir við: „Það er ekki ég sem vel svo úr tilnefningunum, heldur er verið að setja saman nefnd eða ráð sem fer yfir þær.“